3 Fason Byen Senp pou W Fè Jounen w Pi Pwodiktif San Twòp Fristrasyon

Ou leve byen motive, ou di tèt ou:

Jodi a  m pra l fokis epi akonpli tout tach jounen an. 

Ou manje maten,
pran machin, 
tcheke rezo sosyal epi w fè yon pale ak yon zanmi w pa wè lontan lontan. 

Li fenk 11 diswa,
ou poko fè anyen, dòmi nan je w, 
e lè dòmi w gentan pase. 

Yon  fwa ankò, ou pèdi konba a. 
Ou kòmanse doute de kapasite w. 
Chak jou ki pase, w ap pèdi konfyans nan tèt ou...  

E si m di w gen yon solisyon.. 
Yon mwayen pou w evite jounen w yo pase konsa.

Men li, 3 teknik byen senp pou w konbat pwokrastinasyon ak vin pi pwodiktif:

1. Deside sou yon grenn fokis pou jounen an

Nou souvan panse n se bondye oswa sipè-ewo.  
Nou  fè yon gwo tonton lis ki gen plis pase yon douzèn tach.
Nan tèt pa n, n ap ka akonpli yo nan 16 èd tan.

Chak fwa w gade pil tach ki devan w lan, ou santi tèt ou cho.
Alòs ou pwokrastine.
Lè tach yo parèt anpil devan zye w, li friz sèvo w.

Pye w mare, ou tou pa fè anyen. 

Pi bon mwayen pou w atenn objektif jounen w se nan priyorize.

Chak jou poze tèt ou kesyon sa a :

Ki grenn tach si m fè jodi a ka p pouse m pi prè objektif (espirityèl, finansye, entèlektyèl) mwen fikse yo? 

Lè w fin defini l, fokis pou w akonpli omwen grenn tach sa a.

Pito w gen yon grenn fokis ou ka akonpli ke w gen 10-12 ou pa janm akonpli. 

Jan pwovèb popilè a di l la: 

Nou si-estime san ka fè nan yon lane e pi souzestime sa n ka fè nan 5 lane. 

2. Akonpli tach selon òlòj kòporèl ou

Kò w gen revèy pa l.

Si w rive konprann ak dekouvri òlòj kò w, wa p ka òganize jounen w pi byen.
Syantifik yo rele sa rit sikadyen (enèji w varye pandan jounen an).  

Teknik lan se fè travay konplèks yo lè enèji w wo yo,
epi fè sa k fasil/administratif yo lè enèji w pi ba.

Egzanp:

• Devlope yon pwojè VS poste sou rezo sosyal

• Klase papye VS Travay sou yon nouvo estrateji

• Reponn kliyan VS dizay yon nouvo konsèp pwodui

Nan semèn k ap vini an, kenbe yon kanè tou prè.
Siveye nan ki moman nan jounen an ou faya ak lè w anlè kou pipirit.

Itilize konesans sa a pou w planifye tach ou selon enèji w. 

3. Reflechi sou jounen w ak planfiye demen avan w dòmi

Ou pa ka chanje sa w pa mezire ak pa konprann.

Jounen w yo repete menm jan chak jou,
paske n pa pran tan reflechi ak gade kòman yo pase. 

Qui veut Juin, prépare octobre, yo konn di lè n te lekol.

Ebyen:

yon bon jounen depann de sa w fè nan fen jounen avan an.

Aprann chita reflechi sou kijan jounen w pase.

Chak swa planfiye ak adapte w pou jounen demen an. 
Revize tach ou pa fè yo, nòt reyinyon ak pwogrè w fè nan pwojè w ets...
Konsa w ap ka detèmine sa pou w elimine, delege oswa reyajoute. 

Nou pa p janm rive akonpli tout bagay nou vle nan lavi n,
men sa pa vle di w pa bezwen planifye.

Jounen w ka gen mwens estrès, ou ka akonpli plis e bay pi bon rezilta si w :

• Akonpli tach yo parapò ak enèji kòporèl ou

• Defini yon grenn fokis chak jou

• Revize jounen w epi planifye demen avan w al dòmi