7 Fason pou w Transfòme Raj, Depresyon, Lapèn an Kreyativite

Pataje fristasyon, raj ak tristès ou, pataje l an bote men m si l pa bèl

"Gang nan Matisan anpeche m sòti. Kreyativite anpeche depresyon ak dezespwa fini ak mwen. Kreyativite se lavi m”. Se konsa yon jèn ki pa t ka patisipe nan pwogram Street Labs la te reponn mwen sa gen 2 lane.

Tribilasyon, raj ak dezespwa la chanje katye ak fòm, men l pa ale. Kawo eksteryè a ravaje enteryè. Domaj, manchèt nan dlo pa gen mak.

Ban m pataje avè w 7 fason w ka transfòme kawo enteryè a, doulè, depresyon ak lapèn sa an kreyativite.

Lè w aprann kòman pou w kontwole tèt ou, ou louvri yon pòt byen laj sou basen kreyativite, enspirasyon, ak ekselans ki kache dèyè estrès melimelo ak bouyivide ki nan lespri w. Lè w jwenn libète pou w eksplore basen sa, ou pa sèlman amelyore lavi w, ou amelyore limanite.

1. Livre w, ale nan twou san fon an. Aksepte w pa ka chanje mond eskteryè a. Rantre nan raj, fènwa, enkyetid ak doulè w santi a. Gen kouraj santi sa w santi a, san w pa kontwole l. Ale kote w pè a, la a men m se sous enspirasyon pwochen chedèv ou a.

2. Al fè yon ti mache. Al fè lèsanpa san telefòn oswa distraksyon. Pran san w gade ozalantou yo san w pa two fokis sou yon grenn bagay.

3. Repoze lespri a. Pran yon poz, sispann tande nouvèl, monte desann sou medya sosyal. Bloke sa k ap antre. Jis chita bay sibkonsyan an chans pou l marinnen sa l santi a. Si lespri a fatige, li bezwen repo.

4. Rekonesan anvè sa w genyen, sa w poko pèdi yo. Etid montre moun ki rekonesan gen plis kè kontan, plis siksè, konpasyon ak pote plis kontribisyon nan mond lan.

Kijan w ka konbine talan w yo?
Kijan w ka itilize zouti w genyen nan yon lòt fason orijinal?

5. Ranje reyalite w ak kreyativite w. Ale, ale nan mond imajinè a. Ranje kabann ou ak 2 dra w renmen, abiye kòm si w ta pral sòti, fè seyans komedi ak moun lakay ou. Pa kite reyalite tounen reyalite w.

6. Eseye yon nouvo pèspektiv. Eseye mete w nan plas moun ou pa ka wè yo. Eseye gad mond lan ak yon zye timoun, yon zye chinwa, powèt, senaris, antreprenè oswa relijye.

7. Raple w pouvwa kreyatif k ap dòmi nan ou. Men kèk afimasyon ou ka repete.

1. Mwen se yon kanal pou kreyativite bondye epi travay mwen pote fri.

2. Nan kreye ak koute, y ap gide m. Kreyativite se volonte kreyatè a pou mwen.

3. Kreyativite m geri m, li geri lòt moun.

4. Mwen gen dwa angrese kreyatif ki nan mwen an. Avèk kèk zouti senp, kreyativite m ap fleri.

5. Kreyativite m toujou mennen m nan verite ak lanmou.

6. M vle kreye. Mwen vle aprann kite m kreye.

7. Mwen vle sèvi ak kreyativite m. Mwen eksperimante enèji kreyatif mwen an.

8. Mwen dispoze sèvi ak talan kreyatif mwen yo.

Kreyativite se remèd anpil soufrans entèn. Mwen poko jwenn pi bon fason yon moun ka eksprime doulè l an bote. Yon bote ki geri ak konekte ak lòt nanm. Pataje fristrasyon, raj ak tristès ou, pataje l an bote men m si l pa bèl.

Atis oswa saj la konnen byen yo pa bezwen bwè lanmè an pou yo naje ladan l; kidonk, konpleksite pap vale yo. ~ William Irwin Thompson

---

Giving thanks can make you happier
Credit | Cover Picture by Tony Tuch